يا صانع المكياج الله يجازيك
خليتني مخدوع في شكل خلي
الله يحرق مصنعك مع مبانيك
والمعرض الموجود في بيكاديلي
ادعي عسى تعمى وتنشل رجليك
هذا دعائي دوم لا جيت أصلي
خليتني اركض ورا البنت هاذيك
وأشوفها أجمل غرام ٍ حصل لي
قلبي عشقها يا(جيفنشي) توماتيك
وان شافها قلبي يرحب يهلي
هي رحبت بي وقالت الله يحييك
وقالت هلا باللي عشق زين شكلي
وقالت أنا أجمل بنت في اللي حواليك
شف حسني الأخاذ وروجي العسلّي
طالعتها ثم قلت هالقلب يبغيك
ومن شاف حسنك خلى غيرك يولي
ابغي أشوفك دون مكياج يكسيك
وابغي أشوفك بالجمال المحلي
قالت تبيني افرك الوجه تفريك
وأشيل هالبودر وروجي وكحلي
قلت أيه نعم قومي عسى الروح تفديك
ابغي جمالك هالطبيعي يهلّي
قالت دقيق راجعه لك واراويك
ذاك الجمال اللي لعينك يسلّي
ويوم رجعت لي شربكتني الشرابيك
وحسيت الأرض تدور وأنا بمحلي
الخد كنه يا(جيفنشي) سيراميك
والوجه شارع مثل شارع حولي
الوجه كنه بيت كله شبابيك
من هالحفر في وجهها اللي يعلّي
كله سبب مكياجك الله يجازيك
خليتني مخدوع في شكل خلي
ونصيحتي لكل شاب من غير تشكيك
لا لا أتسرع ثم تنغش مثلي
اللي بلا مكياج خلها حواليك
واللي تحط مكياج خالها تولي!!
راقت لي كثيراً ارجوأن تروق لكم
اجمل متدى
